A lingua siciliana è ‘n pirìculu. Semu assai ca a parramu, ma picca ca a sapemu scrìviri. E ogni annu sunnu menu i picciotti e piciriḍḍi ca a sannu parrari bonu. Allura sta simana è un mumentu pi riflèttiri supra l’usu dâ lingua, pi dari n’ammuttuni e fari crìsciri un muvimentu ntra tutti chiḍḍi ca travagghianu pû sicilianu. Sta simana è un mumentu pi canciari i nostri abbitùdini ncapu â lingua.

Veni dittu spissu ca u sicilianu è na lingua sulu pi famigghia e amici stritti, ma nun à’ statu sempri accussì. Sta simana è un mumentu di èssiri rigugghiusi di èssiri bilingui (o trilingui!). Un mumentu pi ricurdàrisi ca è nurmali parrari na lingua riggiunali ‘n Italia e ‘n Europa. Si u tidiscu, u francisi, e u frulanu vennu parrati ‘n situazzioni furmali e ufficiali nta autri riggiuni d’Italia, picchì no u sicilianu ‘n Sicilia?

Adunca, sta simana è un mumentu pi cilibbrari a lingua siciliana ‘n sicilianu. Ognidunu po cilibralla comu voli, ma a manera principali è di parrari u sicilianu nta cuntesti novi. Quannu ncontri quarchidunu pâ strati, mmeci d’accuminzari a cummirsazzioni ‘n italianu, prova a diri “salutamu!” o, si a situazzioni fussi cchiù furmali, “Sabbinidica!” Siḍḍu scrivi spissu ntê riti suciali, picchì nun fari quarchi post ‘n sicilianu? E si voi riggistrari un vidiu di comu vannu sti novi cummirsazzioni ‘n sicilianu, i po’ spàrtiri cull’hashtag #simanadusicilianu !

Pi chiḍḍi ca s’affrùntanu dû so liveḍḍu di sicilianu, sta simana è puru un bon mumentu pi studiari a lingua. Ma tutti nuiautri avemu bisognu di studiari a lingua, picchì comu tutti l’arnisi, cu picca usu s’arruggia!

E pi chiḍḍi ca nzìgnanu a lingua, fannu arti, o scrìvinu ntâ lingua, vulemu vìdiri zoccu faciti! Spartiti sti prujetti cu nuiautri e faremu pubblicità, picchì vulemu vìdiri ca a nostra cumunità è attiva, viva, e ca a lingua po crìsciri assai nta na simana sula. Accussì ni putemu ncuntrari, e sapennu cu’ autru sta facennu boni cosi pâ lingua, u muvimentu pâ lingua crisci.

Cci siti?