31 marzu-7 aprili 2025
Na simana pi parrari ‘n sicilianu, unni è-è
A Simana dû sicilianu è u primu mmàttitu ntirnazziunali pi cilibbrari u sicilianu. È un mumentu pi spàrtiri i nostri prujetti e pi fari vìdiri ca u sicilianu è na lingua viva. È un mumentu pi studiari a lingua, pi putiri scrivilla e parralla megghiu. Ed è n’esircizziu suciali p’usari a lingua nta cchiù cuntesti, cchiù banni, e cu cchiù cristiani 'n Sicilia. U primu annu, 2024, fu un granni successu e semu càrrichi pi 2025!
Usa l’hashtag #simanadusicilianu pi participari!
Comu participari?
-
U scopu principali di stu mmàttitu è chiḍḍu d’usari u sicilianu nta cchiù cuntesti pussìbbili. Cu scanusciuti o cull’amici ca di sòlitu ci si parra ‘n italianu. Ntê putiji, ntê risturanti, ntall’uffici, puru â scola! Sta simana è nu sircizziu suciali pi canciari i nostri abbitùdini, e parrari a nostra lingua nta cchiù cuntesti. U sicilianu nun è na lingua dû passatu; è na lingua di oji!
-
Tutti sapemu parrari sicilianu, ma u sicilianu veru, se? Ma câ tv, a radiu, i libbra, tuttu sempri ‘n italianu, è nurmali ca ni scurdamu quarchi palora! Sta simana è un mumentu bonu pi studiari a lingua e nzignàrisi a scrìviri ‘n sicilianu.
-
Ô sicilianu màncanu assai cosi ca autri lingui muderni ànnu: libbra pî granni, libbra pî picciriḍḍi, seri tv, mùsica, podcast, vidiu. Sta simana è un mumentu pi criari cosi novi pâ lingua. Già facisti quarchi cosa ‘n sicilianu o ncapu ô sicilianu? Fannillu sapiri! Faremu pubblicità a tutti i to prujetti e i spartiremu â fini dâ simana!
Cu’ semu?
Nuiautri semu un gruppu di siciliani e sìculi-miricani ca vonnu vìdiri u sicilianu crìsciri nta l’anni ca vennu. A Simana dû sicilianu nun fa parti di nuḍḍa urganizzazzioni, azzienna, o partitu pulìticu. Pigghiamu spirazzioni dî muvimenti di autri lingui minuritari, comu ô bascu, ô catalanu, e ô gallisi ca già ànnu simani pi cilibbrari e prumòviri i so lingui. Ora tocca ô sicilianu! Vulemu vìdiri u sicilianu usatu nta tutti i banni, ntê putiji, ntê chiesi, nnê travagghi, nnê scoli, e macari ntâ pulìtica e ntô guvernu sicilianu. Ajùtani a custruiri un futuru cchiù beḍḍu pû sicilianu!
Partècipa cu nuiautri!
Munci n’aḍḍijuta pi comu voi participari, poi scègghiri tutti chiḍḍi ca voi. Si voi spàrtiri un pruggettu e voi ca nni facemu a pubblicità, scrivi cchiù assai ntô missaggiu!
Mannamu na para di mail n’anticchia prima dâ Simana pi ricurdari a tutti dû mmàttitu. Nzèmmula putemu fari ciùriri a lingua siciliana!
Arrispunni a stu sunnaggiu supra l’usu e pircizzioni dû sicilianu:
https://tinyurl.com/yt8p3j5r